Қазақ филологиясына іргелі зерттеу еңбектерімен елеулі үлес қосып, соңына телегей-теңіз мол рухани мұра қалдырған көрнекті тюрколог ғалым Сәрсен Аманжолов (1903-1958) туған халқының тарихы мен этнография-сына қатысты мәселерді де зор ыждағаттықпен қара-стырып, дер кезінде жұртшылық кәдесіне жаратып отырған. Ғалымның бұл саладағы маңызды еңбегінің бірі – халқымыздың ұлттық ойыны –«Тоғызқұмалақ» туралы жазған шағын кітапша. Бұл кітапша 1936 жылы қазақ  және орыс тілдерінде «Қазақтың ұлт мәдениетін зерттейтін институты» тарапынан басылып шықты. Кітапшаның құндылығы сонда, ежелден халқымызбен бірге жасасып келе жатқан ойынның алғашқы ана тілімізде хатқа түсіп, тасқа басылуы еді. Кітапшада «Тоғызқұмалақ» ойынының тарихына қысқаша барлау жасалып, ойын ережелері жүйелі түрде түсінікті баян-далған. (Бейсенбай Байғалиев)