Ауыл шаруашылығы ғылымының бір саласы есептелетін шалғындық жəне жайылымдық шаруашылық өсімдік, топырақтану, зоотехния, ботаника, экология, ауа райын зерттеу ғылымы, т.б. да жеке пəндерді білуден тұрады. Сондықтан, оқулықта табиғи аймақтарды, агротехникалық шараларды сипаттау кезінде жоғарыда аталған пəндерге қатысты материалдар кездесіп отырады. Оқулықта малазығындық өсімдіктердің биологиясы берілген. Шалғындықжайылымдық ғылымының бұл тармағы əлі жеткілікті зерттелмеген. Сондықтан, республикамыздың əртүрлі өңірлерінде көп жылдар бойы жүргізілген ғылымитəжірибелік сынақ жұмыстарының тың деректері берілді. Өсімдіктердің адамдар əсер еткен кездегі дамуының түрлі құбылыстарын зерттеу алынған деректерді біртұтас жүйеге шоғырландыруға, оған бірыңғай мақсатты бағыт беруге мүмкіндік туғызды. Оқулықты жазуда əлемдік əдебиеттердегі деректер кең қолданыс тапты. Сондай-ақ, оқулықтағы шабындықтар мен жайылымдарды пайдалануға, жақсартуға байланысты ұйымдастыру шаралары мен агротехникалық тəсілдер ауыл шаруашылығы құрылымдарындағы нақты жағдайларды есепке ала отырып пайдаланылса, сапалы мал азығын, олай болса, сапалы мал өнімдерін мол өндіруге мүмкіндік береді. Оқулық аграрлық жоғарғы оқу орындарының «Агрономия» жəне «Зоотехния» мамандықтары бойынша оқып жүрген шəкірттерге арналған.